قصه سيدنا يوسف 3أ
قصه سيدنا يوسف 3أ
اعوذ بالله السميع العليم من الشيطان الرجيم بسم الله الرحمن الرحيم والحمد لله رب العالمين و الصلاة و السلام على رسول الله صلى الله عليه و سلم إن الحمد لله نحمده نستعينه و نستهديه و نستغفره و نعوذ بالله من شرور انفسنا و من سيئات اعمالنا من يهده الله فلا مضل له و من يضلل فلن تجد له وليا مرشدا, احنا مازلنا مع قصة سيدنا يوسف و هانحتاج مصاحف طبعا, ماينفعش تحضر قصة سيدنا يوسف و مافيش في ايدك مصحف, اشمعنه؟ ماينفعش احضر قصة سيدنا يوسف و مافيش في ايدي مصحف؟؟ لانك مش هاتعرف تتابع ولانك لو بقى معاك المصحف هايبقى تفاعلك مع القران مختلف تماما و احساسك بالايات مختلف تماما و اكتر من كده انك هاتحفظ و احنا قاعدين .. نصيحه يا جماعة احرص ان يبقى في مصحف صغير في جيبك,مصاحف الجيب الصغيرة دي زي مصحف المدينة او غيره, مصاحف جميله جدا جدا وبتخليك دايما القران معاك و تخليك بعيد عن المعصية ,ماينفعش تعصي و تخليك دايما بتقرا قران و دايما بتراجع, و تخليك الحقيقة مرتبط بكتاب الله ليل نهار , انا الحقيقه ملاحظ ان كل المسجد بيتوزع عليه مصاحف طبعا دي حاجه جميله, لكن احسن من كده ,ان انت معاك مصحفك اينما تحركت مصحفك في جيبك يبقى ده زي سلاحك اللي في جيبك يطمئنك و يحفظك, فا اوصيكم ان المرة الجايه نقول ها نفتح المصاحف ماحدش يجيب مصحف.. لان كل واحد في جيبه المصحف بتاعه يبقى عملنا انجاز غير عادي , تاني يا اخونا احنا ليه بنحكي قصص الانبياء ؟ احنا بنحكي قصص الانبياء و عنينا على كذا معنى, المعنى الاولاني ان عايزين نحببك في القران لانك مش هاتعرف تحب القران الا اما تفهم .. الايات دي و انت عايش مع قصص الانبياء تتعلق بالقران اكتر و تحب القران اكتر علشان كده بقول كل واحد لازم يبقى معاه مصحفه.. ان وانت ماشي هاتقول ايه ده؟ده انا ماكنتش بتعامل مع القران كده! ولا كنت بفهم القران كده ! فا تبدا تستشعر القران بحلاوة جديدة و تفهم القران باسلوب جديد ..تاني حاجه بنستفيدها الحقيقه من قصص الانبياء ان انت طول ما انت ماشي مع قصص الانبياء بتاخد عبر و عظات في حياتك .. يعني احنا النهارده هانطلع بأربع معاني اساسية لازم المسلم يكون عنده الاربعة دول و هاجي في اخر الدرس و اقول لكم ايه هم بقى الاربعه؟حد فاكر ايه هم الاربعه اللي احنا طلعنا بيهم النهارده ؟ فا ده هايبقى محور كلامنا, تعالو نبدأ القصة, انا هارجع لوره سنه و اقول بسرعة علشان اللي بقالهم مده مابيحضروش يتابعو معانا و يبقو عارفين احنا بنتكلم فين.. سيدنا يعقوب عنده 12 ابن 10 منهم من ام و 2 منهم من ام تانية, الاتنين من الام التانية هم اصغر اتنين اللي هم سيدنا يوسف و سيدنا بنيامين او اخوه بنيامين و العشره التانيين كبار, عصبة, هم اللي قايمين بكل اعمال سيدنا يعقوب بلغو مبلغ الكبار و الرجولة , سيدنا بعقوب بدأ يبقى كبير في السن فا هم اللي بيقومو بكل الاعمال اللي محتاجها سيدنا يعقوب بيعتمد عليهم بشكل اساسي لكن اصغر اتنين دول لسه صغيرين و من ام تانية بس سيدنا يعقوب بيحنو عليهم حنية زايدة شوية زي اي اب و زي اي ام بيحنو على الطفل الصغير.. اصغر ولد من ولادهم حنية زيادة شوية هو ده اللي قام بيه سيدنا يعقوب.. بس ملحوظة على جنب كده..هو سيدنا يعقوب كان متجوز اتنين؟ هو سيدنا ابراهيم كان متجوز اتنين؟ طب اشمعنا لغايه الاسلام بيقولو يااااااااااه ده الاسلام قاسي جدا , ده الاسلام فيه ايات بتقول التعدديه, طب ما كل الانبياء كانو كده.. اشمعنا جيتولغايه الاسلام وواجهتوه؟ يعني حد فكر في الرد ده قبل كده؟ ما هو سيدنا يعقوب اهه و قبليه سيدنا ابراهيم اتجوز السيده مريم و السيده سارة.. انا مش عايز الستات يزعلو مننا احنا مش جايين نقول للرجاله لازم تتجوزو.. احنا جايين بنقول بندافع عن الاسلام او بنقول ياللي بتهاجمو الاسلام انتو ليه بتهاجمو الاسلام اذا كان كل الانبياء من قبل كده؟.. دي بس ملحوظه كده سريعه مش هتزعل الستات ان شاء الله .. سيدنا يعقوب سمع من سيدنا يوسف رؤية الرؤية بتقول انه هايرى احد عشر كوكبا هايسجدو ليه و الشمس و القمر.. اولها سيدنا يعقوب ان اخواته هايخضعو ليه وان سيدنا يعقوب نفسه و زوجته اللي هو ابوه و امه الشمس و القمر هايسجدو ليه معناها هايخضعو ليه.. سيدنا يعقوب نبي فا على طول قام سيدنا يعقوب قايل "نبي يخضع لنبي" لا يمكن نبي يخضع الا لنبي فا عرف سيدنا يعقوب ان الرؤية دي معناها ان سيدنا يوسف هايبقى نبي, شوف تأويل الرؤى!, قعدنا نتكلم عليها كتير.. انا بس بجيب الاحداث بسرعه علشان اللي بقالو كتير ما حضرش و اول مرة تكمل معانا القصة .. فا سيدنا يعقوب يعلم يقينا ان يوسف هايبقى نبي.. يوسف الان عنده كام سنه؟ عنده حوالي من 9 ل 12 سنة و هو الان داخل على سن ال12, بدأ الاخوه يكيدو, يكيدو ليه؟ بدأو يحسو ان هو متميز جدا , بدأو يحسو ان ابوه بيحنو عليه حنية زيادة , دي استغفر الله ماهياش من سيدنا يعقوب تفرقة بين الاولاد.. ابدا..ده هو ده الطبيعي لأي اب عنده طفل صغير فا بيديله من الحنان ما هو زائد, و بدأو يقولو الاية بتقول " لقد كان في يوسف و إخوته ايات للسائلين" هانمشي معاهم بسرعة كده من اول الاية 7 " لقد كان في يوسف و إخوته ايات للسائلين" اخوته اللي هم مين؟ اللي هم اخواته اللي هم ولاد سيدنا يعقوب اللي هم كام؟ اللي هم 10 .. هم مين دول؟ حد عارفهم؟ خلي بالكو ال10 دول هم بداية الاصباط .. الاصباط اللي هم مين؟ اجداد اليهود ..فا طلع منهم كل ذرية اليهود من ال10 دول, اه, طب و احنا مالنا؟ انت واخد بالك صفات ال10 دول ايه؟ وواخد بالك هايعملو ايه؟ شايف الحقد اللي فيهم؟ ده احنا هنلاقي الجينات عماله تتوارث اهه! هاتبص تلاقي الصفات بتتوارث, تعالو كده نحلل ال10 دول هتلاقي ايه؟ هتلاقي الحقد الشديد, هتلاقي الحسد الشديد, هتلاقو الشعور بالاضطهاض.. هو ابونا بيفضله علينا ليه؟ هو حد فضل عليكم حد؟ انتو كلكو ولادي.. ده احنا هانشوف دلوقتي سيدنا يعقوب بيحبهم فعلا.. هاتشوفو دلوقتي فعلا بيحبهم .. طيب امال ليه هم حسين كده؟ هم جواهم شعور دائم بالاضطهاض, هتلاقو سرعة التفكير في القتل ببساطه "اقتلوا يوسف" "فلما ذهبو به و اجمعو" كله اجمع هانقتله.. ايه ده؟ بالبساطه كده؟ هاتلاقي سوء الأدب مع الانبياء "إن ابانا لفي ضلال مبين" تخيل حد يقول على ابوه كده! ابونا في ضلال.. ابونا تفكيره خائب ..ضائع.. ابونا خرف.. شايف الصفات؟!شايف الصفات ال 10 اللي هايطلع بيهم بعد كده يهود.. خطيرة دي ماتعديش دي.. طيب نرجع تاني "لقد كان في يوسف و اخوته ايات للسائلين" الايه 8" اذ قالو ليوسف و اخوه احب الى ابينا منا و نحن عصبه إن ابانا لفي ضلال مبين اقتلو يوسف او اطرحوه ارضا يخل لكم وجه ابيكم وتكونو من بعده قوما صالحين" الايه 10 "قال قائل منهم لا تقتلو يوسف و القوه في غيابت الجب " "لا تقتلو يوسف"ده الحنين اللي فيهم.. قال لهم ايه؟ ماتقتلوهوش.. امال نعمل ايه؟ ارموه في بير مالوش قرار.. تخيل؟ ده الحنين .. خلي بالك ده قد يكون اسوأهم.. ليه؟ الراجل ده عايز يهرب من نفسه فا مش عايز يقتل بأيده فا قال لهم ارموه في بير عميق.. كلمه "غيابت" قعدنا نتكلم فيها نص ساعة المرة اللي فاتت.. كلمه غيابت جيه من ايه؟ جايه من الغيب, الغيب يعني ايه؟ يعني ما لا تراه بعينك.. فا سمي عالم الغيب الجن و الملائكه الجنه و النار غيب " اللذين يؤمنون بالغيب" و جت منها كلمه الغيبة.. انك تغتاب واحد انك تجيب سيرته و هو مش موجود.. و جه منها القبر ... القبر في اللغه العربيه اسمه "ويبه" او "غيب" ليه؟ لانك غيبته تغييبا.. نزلته تحت الارض فا غاب عن العيون .. تخيل حطوه فين؟ في غيابت.. تخيل؟ انت متخيل ان ده الطيب اللي فيهم" في غيابت الجب" و قال الجب ماقالش البير ليه؟ لان البير يا جماعة بير عادي لكن الجب هو البئر العميق الممتلىء بالحيات و العقارب شديد الظلمه..ياااااه..فلما تقول على بير ان هو ليس له نهايه يعني عميق جدا ماتقولش بير قول جب.. فا الكويس اللي فيهم قام قايل ما تقتلوهوش لكن ارموه في غيابت الجب و هو عايز يريح قلبه قام قايل لهم ايه؟ "يلتقطه بعض السيارة" انت بتضحك على مين؟ يعني انت عايز ترميه في غيابت الجب و تفتكر ان في حد هايعدي ياخده؟ ده انتو في قلب الصحراء .. على فكره دول بقو ياخدوه.. اصل هم خافو لو رموه في بير قريب حد يطلعه و هو سيدنا يوسف يعرف البيت فا هايرجع لوحده فا بدأو يتوغلو بيه في الصحراء جوه جوه جوه علشان هو طفل صغير 12 سنه مش هايعرف يرجع عايزين يتوهوة.. ايه الحقد ده؟ و ايه الغل ده؟ فا اخدوه و طلعو بيه على اقصى الصحراء " قال فائل منهم لا تقتلو يوسف و القوه في غيابت الجب يلتقطه بعض السياره إن كنتم فاعلين" و طلعنا منها بمعنى كويس اوي.. ان احنا احيانا احنا كمان سعات نضحك على نفسنا.. تبقى عايز تعمل المعصية او الجريمة بس مش عايز تعملها عيني عينك فا تضحك على نفسك و هي هي مافرقتش... انت مش عايز تصحى الفجر, تقول مايصحش, تقوم عامل ايه؟ تقوم ظابط المنبه و موطيه على الاخر .. او هو حس ان علاقته بالبنت دي حرام فا يقول لها بصي انا محرج اكلمك كلميني انتي علشان انا حرام انا اتصل بيكي و بعدين اقول يا رب هي تتصل و انا راجل مؤدب معلش.. يا جماعة ما تضحكش على نفسك اوعى تعمل غلطتهم..غلطتهم عملو كده .. قال مايقتلوش بايده لا لا لا احنا مانقتلش احنا هانعمل فيه حاجه عذابها اشد من القتل علشان يريح ضميره فا كانت النتيجة ان ربنا ضيعهم 40 سنه ظلو في ضلال 40 سنه بسبب ان هم ضحكو على نفسهم ..خليك واضح مع نفسك هي دي اللي قعدنا نتكلم فيها المرة اللي فاتت 10 دقايق ارجوك لما تبقى عاصي اقف قدام نفسك واجه نفسك اقف في قوضتك و طلع ورقة و قلم و اكتب عيوبي و اكتب بقى 1,2,3,4 اكتبي انك بتغتابي الناس.. قولي انا لو قابلت ربنا بالعيب ده هاتبقى كارثة! اكتب ان انا مابغضش بصري.. اكتب ان انا بتحايل على المدير بتاعي و باخد الفلوس اللي كذ ا حرام .. اكتب ان انا عمال افتري علشان اضيع زميلي اللي في الشغل و اخد مكانه.. اكتب بقى خليك واضح مع نفسك.. تصدقو يا اخونا ان احنا سعات بتستخبه من عيون الناس علشان ما يعرفوش اخطئنا و بعد شويه نستخبه من نفسنا علشان مانواجهش نفسنا بأخطئنا فا نفاجيء بيها يوم القيامة.. بالله عليك واجه نفسك.. اوعى تعمل الغلطة اللي هم عملوها.. انا يا جماعة مش جاي احكي قصص و حواديت انا بقعد قدام الاية و انا بحضر عمال اقول يا رب الناس تستفيد ايه من الايه دي؟ فا تفاجأ اقعد اطلع اطلع معاني الاقي كتب التفسير قايله نفس الكلام كأن الايات واضحة, المعاني واضحة ربنا عايز يبعتلنا الرسالة دي, "اقتلو يوسف او اطرحوه ارضا يخلو لكم وجه ابيكم وتكونو من بعده قوما صالحين" بعني ايه " و تكونو من بعده قوما صالحين"؟ نوو ان هم يقتلو و يتوبو في نفس الوقت .. تخيل نوى المعصية و التوبة في نفس الوقت تتقبل؟ فلم تقبل 40 سنة.. في ناس بتعمل كده انا هاعمل بس الذنب ده يا رب و والله انا بعديه هاتوب على طول .. يعني اخر مرة هاخرج مع فلانة و بعديها خلاص دي اخر مرة فا تكون النتيجة لو نويت المعصية و التوبة في نفس الوقت تكون النتيجه ايه؟ فا ينسيك التوبة بال 20 , 30 سنة.. ده اللي حصل معاهم نساهم العوده و فضلو في ضلال.. و فضلو مخبين على ابوهم 40 سنة مش قادرين يواجهوه و الاب عمال يتعذب وهم عمالين يشيلو ذنوب مين؟ فاخلي بالك اوعى تعمل كده و يضحك عليك الشيطان و يقول لك يا عم انت هاتتوب.. مش هاتتوب الاية 10 " قال فائل منهم لا تقتلو يوسف و القوه في غيابت الجب يلتقطه بعض السياره إن كنتم فاعلين" الاية 11 " قالو يا ابانا ما لك لا تأمنا على يوسف و انا له لناصحون ارسله معنا غدا يرتع و يلعب" على فكره مش يوسِف يوسُف يعني اتعود حتى وانت بتنادي على واحد اسمه يوسف مافيش حاجه اسمها يوسِف اسمه يوسُف فا هو سيدنا يوسٌف اسمه يوسُف فا احرص ان انت تقولها كده "ارسله معنا غدا يرتع و يلعب" و جينا عند الايه دي و قلنا ايه ده؟ القران جاب كلمة يلعب؟ يرتع يعني ايه؟ ياكل زي ما هو عايز يقعد و ياكل و ياكل و ياكل جايه من الرتع يعني عمال ياكل زي ما هو عايز و يلعب , اذن هو في في القران كلمه يلعب؟ يعني هي كلمة يلعب مش عيب تييجي في القران؟ طب هو سيدنا يعقوب مش قال لهم عيب لما تقولو رايحين نلعب ؟ و بعدين ده بيقولو ايه؟ "ارسله معنا غدا يرتع و يلعب" ده كأنها رحلة .. هو ينفع ييجي في القران حاجات زي كدة؟ يا جماعة افهمو الدين على بعضه الاسلام فيه راحه و فسحة و فيه رياضة و فيه خروج و فيه ان انت تستمتع بحياتك طال ما ما عصتش ربنا بدليل ان القرأن نفسه اثبت كلمة اللعب.. جابها .. و ماعلقش عليها بعد كده ازاي يقولو كده او دي من ضمن معاصيهم ابدا و سيدنا يعقوب وافق ان هو يروح يلعب معاهم شوفو.. طالما ما عصتش ربنا, ده بل بالعكس فكر ليه اثبتت في القران؟ لان مطلوب ده للشباب خلي بالكو دول كانو كلهم شباب مطلوب ان هو يلعب مطلوب ان هو يخرج "ارسله معنا غدا يرتع و يلعب وانا له لحافظون" " قال اني لا يحزنني ان تذهبو به و اخاف ان يأكله الذئب و انتم عنه غافلون قالو لئن اكله الذئب و نحن عصبه انا اذن لخاسرون" هو ليه جاب سيرة الديب؟ لان المنطقة اللي هم رايحين يلعبو فيها مليانه بالذئاب فا علشان كده سيدنا يعقوب جه في عقله على طول كلمه الذئب, الايه 15 "فلما ذهبو به و اجمعو ان يلقو به في غيابت الجب و اوحينا اليه لتنبئنهم بأمرهم هذا و هم لا يشعرون " دي الايه اللي احنا كنا واقفين عليها المرة اللي فاتت و قعدنا نقول يا جماعة تخيلو.. تخيلو و هم واخدينه بقى.. تخيل السباب و الضرب و الاهانه و الغل و الحقد و دول اخواته و هو عنده 12 سنه تخيل حالة سيدنا يوسف و تخيل هايرموه في بير و هايقلعوه قميصه.. ليه هايقلعوه قميصه؟ مش "وجائو على قميصه" يبقى هم كمان هايرموه من غير هدومه, فا هايقلعوه الهدوم و هايفضلو يدورو على بير في اقصى الصحراء تخيل البلاء اللي هايتعرض ليه سيدنا يوسف؟ حد يا جماعه اتعرض لحاجه زي كده؟ الناس اللي مش قادره تصبر حد شاف شيء اصعب من كده؟ و يفضلو يتوغلو بيه في الصحرا لغاية ما يوصلو عند بئر عميق في وسط الصحراء مكان لا يصل اليه انسان و يتأكدو ان يوسف ماينفعش يرجع .. تاه خلاص حتى لو طلع و ده مستحيل مش هايعرف يرجع و بعدين مش هاينزلوه لغايه البير تحت خالص ده في نص البير هايقومو يلقوه ..فاكرين الكلمه "والقوه" يعني كمان ده ممكن ينزل يموت و هو نازل و ينزل في بير ,البير قعره ماء و فيه صخور و فيه حيات و تخيل صوت الحيات و العقارب وهو بيسمعها و سنه 12 سنه و هايقعد في البير 3 ايام و كيف يأكل و كيف يعيش و اي الم و اي خوف و اي ظلمة؟ انت متخيل سيدنا يوسف ده نبي من انبياء الله تبارك و تعالى فا مهما اصابتك مصيبه اصبر.. خلي بالك العبرة الاساسية هنا اصبر اتعلم من سيدنا يوسف عليه السلام, انت ايه مصايبك في حياتك؟ انت ايه الابتلاءات اللي اتعرضت ليها في حياتك جمب الابتلاء اللي بيتعرض اليه سيدنا يوسف الان؟ و يبدأ سيدنا يوسف مش مصدق ان اخواته بيعملو فيه كده فا عمال ينادي عليهم و اصواتهم عماله تتباعد "يا اخوتي اهذه وصاية ابي لكم"؟ هي دي وصية ابويه ليكم؟ لا يردو.. اي قسوة القلب؟ و اي جحود دول مين دول؟ اي قسوة و اي جحود ان 10 يعملو في اخوهم كده ؟ الايه تقول لك "واجمعو" معقوله مافيش واحد طلع فيهم قال لهم لا يا جماعه مايصحش نعمل في اخونا كده! طب ابونا هانعمل فيه ايه؟ ازاي نسيب ابونا يموت حزنا عليه؟ ايه القسوة دي؟ يا ترى في حد قاسي كده؟في امة محمد صلى الله عليه و سلم؟ تصدقو للاسف في.. الست اللي اختها ماتت وولاد اختها بقالها 10 سنين ماسألتش عليهم اصلهم متخانئين على فلوس و هي زعلانه منهم لو شافتهم في الشارع ماتعرفهمش.. معقوله النوعيه دي بقت موجوه في امه محمد صلى الله عليه و سلم؟ ياااااااااااااه ده موجود اكتر من ده كتيييييير,ده في ناس مقاطعين اهاليهم بقالهم ييجي 13 سنة, ده في واحد لو شاف عمه في الشارع مايعرفوش! يبقى ايه اللي جرى للامه؟اتاري اللي بيحصل في الامه ده مش من شويه ..احنا السبب في اللي بيحصل لنا احنا هدمنا اساسيات قام عليها ديننا.. فين صلة الرحم؟ ده احنا بقينا نسمع في الجرائد ان في واحد قتل ابوه و امه! وواحدة عملت كذا في امها و بقينا نسمع على شباب صوته على صوت امه يخلي امه ترتجف و تعيط!! يااااااااااه هي دي امه محمد صلى الله عليه وسلم؟ وبعدين زعلانين و عمالين تضحكوو و نقول الحنين اللي فيهم و نتريق عليهم! ده احنا بقى فينا مصائب شديده علشان كده بقينا مقهورين.. سبحان الله "ان الله ليس بظلام للعبيد" ربنا مابيظلمش يا اخونا "وما ظلمناهم ولكن كانو انفسهم يظلمون" فا تخيل .. طيب و بدأ سيدنا يوسف ينزل في البئر و اصواتهم بتبعد فبدأ ينادي عليهم " يا اخوتي ان ابيتم إلا تركي فاسمعو وصيتي" بدأ يقول لهم وصية الكلام ده مكتوب في الاثر مش موجود في حديث صحيح لكن موجود في الاثر ولا ليه دلالته و لكن لانه متخيل ان هو قال كلام مشابه ان لم يكن اكيد هو عمال يناديلهم و يقول لهم ايه؟ فا بينادي عليهم فا بيقول لهم "يا اخوتي اذا اجتمعتم فاذكرو وحشتي واذا اكلتم فاذكرو جوعتي واذا شربتم فاذكرو عطشي واذا رأيتم غريبا فاذكرو غربتي " و عمال ينده عليهم لعل قلوبهم ترق مابيرقوش ابدا قلوب قاسيه جامده و هو بينادي عليهم فاذا بالوحي "واوحينا اليه لتنبئنهم بامرهم هذا وهم لا يشعرون " اهدى يا يوسف الله معك.. يا اخونا والله في عز الازمه تلاقي رحمات كده نازله على قلبك بس انت اهدى.. اهدى كده و اتصل بربنا هاتبص تلاقي "واوحينا اليه" دي بتحصل معاك بس بشكل مختلف "واوحينا اليه لتنبئنهم بامرهم هذا وهم لا يشعرون " كأن ربنا بيقول له يا يوسف كف عن مناداتهم انشغل بذكري اذكرني انا الباقي لك.. فا بدأ بقى يدعو الله تبارك و تعالى كما في الاثر يقول " يامؤنس كل وحيد يا صاحب كل غريب يا سامع النجوى يا كاشف البلوى" وبدأ ينادي على الله و يذكر الله .. الحقيقه انا بهدي الكلام ده لكل صاحب مصيبه.. للام اللي فقدت ولادها, و الاب اللي تعبان في شغله و اللي عنده مشاكل مع اولاده واللي اولاده مغلبينه واللي فقد عمله و اللي عنده مرض مزمن و اللي عنده و اللي عنده و اللي عنده ..يعني بذكرك الجأ الى الله تعلم من يوسف "واوحينا اليه لتنبئنهم بامرهم هذا وهم لا يشعرون " في ملحوظه عجيبه يا اخونا.. يوسف جده مين؟ سيدنا ابراهيم عليه السلام جده الكبير .. سيدنا ابراهيم ابتلى بأيه؟ بالاقاء في النار و حفيده ابتلى بأيه؟ بالاقاء في الماء.. كأن الله تبارك و تعالى عايز يوصل لنا معنى جميل جدا جدا.. الله يبتلي من يشاء كيف يشاء و قد يبتلى الاب و ابنه بأمرين عكسيين ده يبتلى بالنارو ده يبتلى بضد النار الماء الاتنين صابرين و الاتنين موصولين بالله فا مفارقات القدر تدعوك ان انت تعرف ان الله بيده الامر كله .. تعالو نبدأ ندخل بقى في الايات الجديدة الاية 16" وجاءو اباهم عشاء يبكون" الايه دي كلها علم نفس.. يعني ايه؟ اساتذه علم النفس محتاجين يسمعو الايه دي.. تخيل 4 كلمات كلها علم نفس ..اول حاجه "وجاءو اباهم" امتى؟ "عشاء" هو القران فيه كلام زياده يا اخونا؟ تفرق معانا جم بالليل ولا الصبح ولا ماتفرقش ؟ لا.. تفرق.. ايه قيمه كلمة "عشاء"؟ علشان مايقدروش يحطو عنيهم في عنين ابوهم و الدنيا منورة.. هايتفضحو ..العين هاتفضح الكذب.. فا اضطرو يستنو لما الدنيا تليل فا تختفي العيون عن العيون فا يكذبو براحتهم ..اهه دي حته في علم النفس غريبه اوي.. ان الوجه مهما كنت كذاب يفضحك.. مهما كنت قادر على الكذب و ملفأ الكذبه كويس قسمات الوجه و نظرات العين تنبىء عن الصادق و الكاذب.. فطرة يا جماعه ربنا راميها في قلوب البشر القاها الله في قلوب الناس.. انه ان كذب بلسانه مايعرفش يكدب بعنيه ان كذب بلسانه مايعرفش يكذب بوشه تخيل عذر الجريمه اللي هم عملينها.. كارثه!! قاتلين واحد, لكن مع ذلك ماقدروش يواجهو ابوهم بالنهار فا قعدو مستنين مأخرين العوده لابوهم لغايه ما الدنيا ليلت " وجاءو اباهم عشاء" بالليل و الدنيا ضلمه علشان يكدبو زي ما هم عايزين .. كأن المعنى ايه؟ نستفيد احنا بقى ايه؟ نستفيد ان في شباب و بنات كتير يقول انا مشكلتي ان انا ساذج اول ماجي اكذب يبان على وشي على طول.. لا انت مش ساذج ..انت فطرتك نقية ..بالعكس.. البنت اللي قادره تكدب على ابوها و امها سنتين متجوزة عرفي و لا مصاحبه فلان و قدر وشها كمان يمثل الكدب انتي فطرتك ناقصة شوفو كلمه "عشاء" طلعنا منها ايه؟ شوفو القران؟ ايوه ماهي كده.. انت قادر انك تقدر تكدب بوشك و عنيك؟ لا مابعرفش.. يبقى تفرح بقى ماتقولش على نفسك ساذج قول فطرتي لسه نقيه.. لا ده انا جدع جدا ده انا ادخل قدام الحديد و اكذب عليه و اخده يمين و شمال ووشي ايه مايتحركش, و في بنات كده, و في شباب كده.. نقول له انت فرحان.. بس خلي بالك انت ممكن تكون اسوأ من اخوه يوسف .. ماقدروش يكدبو بوشهم و عنيهم انت قدرت تعملها, خلي بالك هم ليه ماقدروش يكدبو بوشهم و عنيهم ؟ لسه الفطرة كويسة.. لسه في حته فطرة, طب كل واحد قاعد هنا يسأل نفسه انا بعرف احبكها كويس بعنييه و وشي ؟ اه بعرف .. خلي بالك ان ده من دلائل ان فطرتك فيها مشكلة.. ده من دلائل ان فطرتك فيها مشكلة ..شوفو الكلمة " وجاءو اباهم عشاء" فا بص اللي بعدها " وجاءو اباهم عشاء يبكون" هم المفروض ايه ؟" يتباكون" مش كده؟ هم يعني حاسين بالالم؟ مش كده؟ طب ليه القران ماقالش يتباكون ؟ " وجاءو اباهم عشاء" لا مش "يتباكون" "يبكون" فعلا ليه؟ فضلو عايشين على الكدبه لغايه ما صعب عليهم يوسف.. فا عيطو.. فا بدأو يعيطو حزنا على يوسف.. الدنيا ضلمه و ماحدش شايف العينين عامله ازاي و ماحدش شايف قسمات الوجه يمكن الوش بيضحك لكن جواهم قعدو يقولو لابوهم ده صعب علينا ده حصلو كذا ده اتاكل كذا فا بدأو يبكون.. لذلك الحقيقه من الحاجات الجميلة الاعمش احد التابعين كان قاعد عند شريح القاضي الاسلامي الشهير فا جاءت امرأه لشريح بيشتكي من امرأه اخرى فا عماله تشتكي من المرأة الاخرى وبدأت تبكي و تبكيي تبكي و تبكي و شريح عمال يسألها ولا بيبص لدموعها فا بدأ الاعمش يقول لشريح "كف عن سؤالها الا ترى دموعها؟" انت مش شايف عماله تعيط ازاي؟ قال "لا والله ان اخوه يوسف قتلو يوسف و جاءو يبكون و هم كاذبون فلا تحكم الا بالحق" نتعلم برده معنى حلو اوي.. اوعى تحكم على الناس بدموعهم .. اوعى تحكم على الناس بالدموع ..ده معنى جميل جدا .. احكم على الناس بالاحداث و الوقائع.. بص لوقائع الناس.. في ناس كتير جدا يلاقي ابنه بيعيط و ابنه غلطان فا يقعد يطبطب عليه لدموع الولد لغايه ما الولد يطلع متدلع او يطلع بايظ لأ رد على الناس صح و اتعامل مع الناس صح وماتحكمش على الناس بالدموع ,اهي دي خبرة من خبرات الحياة نتعلمها من سورة يوسف مش بقول لكو الاية كلها علم نفس ؟ طيب ننقل على الاية اللي بعدها الاية 17 "قالو يا ابانا انا ذهبنا نستبق و تركنا يوسف عند متاعنا" نستبق.. نرجع فين لقضية الرياضة شوفو القران يا جماعة ..طول ما احنا ماشيين هتلاقي عمال تطلع جواهر من القران.. نستبق يا جماعة في اللغة ..ايه اللي جه في ذهنك على طول؟ جري مش كده؟ لا كل انواع المسابقة تدخل تحت كلمه نستبق يعني فرسان بيسابقو بعض, تدخل مثلا رمي بالسهام تدخل,يعني لعب الكورة تدخل في كلمة نستبق ؟ انا مش بقول كانو بيلعبو كورة بس انا عايز اقول لك انها موجوده في القران .. ماحدش ياخد من كلامي ده ان انا بقول لكو يلا نطلع كلنا نلعب كورة ليل و نهار , انما انا عايز اقول لك ان الاسلام يشمل الرياضة و يشمل الترويح عن النفس و ادي القران بيثبته ماتعقدش الامور على نفسك ماتنظرش للاسلام من زاوية ضيقة جدا .. الاسلام يعني اقعد في الجامع طول النهار اتعبد و مش عارف اعمل ايه و افضل طول النهار ليس لي حاجة الا العباده.. كلام مش مظبوط.. كلام غلط.. عايزينك ناجح في كل نواحي الحياة عايزينك رياضي عايزينك تجيد اللعبة الفلانيه مش عايزين نلاقي شاب ما بيعرفش يعمل ولا رياضة لازم تتفوق في رياضة من الرياضات و يجيد مهارة من المهارات و يعرف لغة من اللغات انت شايف تبقى مسلم كويس؟ ما تتعلم من القران ..فا يبقى "ذهبنا نستبق" اهه ثابته في القران و قلنا لها مجالات عديدة و سيدنا يعقوب لم ينكرها " انا ذهبنا نستبق و تركنا يوسف عند متاعنا فأكله الذئب " طبعا كلمه اكله الذئب حبو ييجو لسيدنا يعقوب بكلمه هو كان قالها قبل كده علشان يحبكو.. يا ابانا احنا طلعنا عملنا مسابقة و قلنا ليوسف يقعد عند الهدوم بتاعتنا فا زي ما انت توقعت.. الديب كله.. علشان تبقى مسبوكه و بعدين قامو قايلين ايه؟ " فأكله الذئب وما انت بمؤمن لنا ولو" شوف كلمة ولو دي "ولو كنا صادقين" يبقى هم صادقين ولا كذابين؟ كذابين.. يعني هم بيعترفو ده احنا حتى لو كنا صادقين مش هاتصدقنا عارف "يكاد المريب ان يقول خذوني" اللي شاكك في نفسه يكاد يقول لهم يا جماعه خدوني على القسم انا اللي عملتها , فا وقعو بلسانهم من غير ما يدرو كأن الايه عايزة تقول لك ان مهما كنت شاطر في الكدب هاتقع, شوفو كل الايه بتوريك هم ازاي كدبتهم متلفقه كويس و اخر الايه بتوريك ان هم ماعرفوش يكدبو طلعو في الاخر كدابين " وما انت بمؤمن لنا ولو كنا صادقين" و فيها حته تانيه برضو فيها سوء ادب مع ابوهم انت يا ابونا دايما سيء الظن تخيل واحد بيقول لابوه كده؟ على فكرة في شباب و بنات بيقولو لاهاليهم كده.. انتو على طول تظنو ان احنا هانعمل حاجه وحشة ! وهم فعلاهايعملو حاجه وحشة و اهاليهم فاهمينهم كويس لكن يبدأ علشان يضغط على ابوه و امه و مايقولولوش انت رايح فين و جيت منين هو انتو على طول شكين ان انا هعمل حاجة وحشه ..خليك صادق مع اهلك و بعد كده طالبهم ان هم تجاربهم معاك الطويلة بتقول ان انت كاذب و بتقول ان انت مراوغ " قالو يا ابانا انا ذهبنا نستبق و تركنا يوسف عند متاعنا فأكله الذئب وما انت بمؤمن لنا ولو كنا صادقين" الايه 18 "وجائو على قميصه بدم كذب" الايه دي فيها معنى مهم اوي اولا "وجائو على قميصه" شوف الغلطة التانيه اللي هايقعو فيها.. جم لابوهم بالقميص زي ما هو.. مش يقطعوه! يعني خايبين كمان يعني جابو القميص "قميصه" كما هو وقامو دابحين شاه و خدو دم الشاه دي و بدأو يلطخو بيه القميص و جم بيعيطو شوف يا ابونا الدليل اهه ادي الدليل قميصه فنظر سيدنا يعقوب الى القميص "وقال ما ارحم هذا الذئب اكل ابني ولم يمس قميصه" يبقى سيدنا يعقوب جابها ولا ماجبهاش؟جابها .ز وبص فطانه المؤمن , شفت المؤمن سريع البديهه ازاي؟ مش ساذج كده و خلاص ,لا ,المؤمن مش زي ما انتو متخيلين اصل شباب كتير بيمنعهم من التدين ايه؟انه متخيل ان المتدين ده عامل ازاي؟ يضحك عليه و ساكت كده و تقول له كلمتين.. يا عم متدين يا عم الشيخ و تضحك عليه وتتريق عليه.. متدين بقى.. لكن مش متخيل متدين سريع البديهه.. مش متخيل متدين ناجح.. مش متخيل متدين دمه خفيف.. مش متخيل متدين شاطر, ناجح في تجارته, فاهم الدنيا ماشيه ازاي, مش يتضحك عليه بأي كلمتين, هو ده المؤمن .. فا اول ما بص للقميص و بص الكلمه اللي بتوجعهم بقى من تحت لتحت قال لهم " ما ارحم هذا الذئب اكل ابني ولم يمس قميصه" انتو كدابين .. طب ليه ماقالهالهمش في وشهم؟ يعني ايه ماجاش في الكلمه و قال لهم انتو كذابين؟ سيدنا يعقوب مربي لو قال لهم في وشهم انتو كذابين عمال يكسر جواهم حاجات و يزودهم حقد على اخوهم .. مش كده؟ فا مش عايز يواجههم بالكلمه دي بيخبطهم من تحت لتحت , في اباء و امهات لو شافو ولادهم -دي نصيحه للاباء و الامهات- لو شافت ابنها عمل معصية كل ما يغلط معاها تعيره بالمعصيه دي.. فاكر لما عملت كذا؟ فاكر لما سويت كذا؟ فا تبقى عماله تهدم جوه الابن من جواه و كان لو انتي مربيه كويسة تغمضي عينيك و ترميله الكلمه من تحت لتحت زي ما سيدنا يعقوب قال , الحقيقه.. شوفو التربيه في الاسلام؟ شوفو كل شويه عمالين نطلع على معنى مختلف ازاي؟ فا سيدنا يعقوب مش عايز يدمرهم مش عايز يقول لهم انتو كدابين فا يقولو اه, احنا كذابين و اعمل اللي انت عايزه ..مش عايز يوصلهم لديه , اوعو تقعدو تدوسو على ولادكم و تكشفوهم ان هم كذابين و اكتشفناكو ان انتو عملتو كده الا يمكن في مرحله متأخرة لو اصرو و اصرو و اصرو ما ينفعش تفضل كده على طول لكن لحد وقت طويل لازم تتعامل مع ولادك ان انت تعمل نفسك مش شايف و توجه
أو إستخدم بيانات :