عمرو خالد: شاهد أرض الجنة كيف أصبحت.. لن تصدق ما حدث

بقلم | مصطفى محمد | السبت 06 مايو 2023 - 12:26 م

يكشف الداعية الإسلامي الدكتور عمرو خالد، من خلال مقطع الفيديو المنشور على صفحته الرسمية على موقع "يوتيوب"، لمشاهديه ومتابعيه كيف أصبحت أرض الجنة والتي حكى لنا عنها المولى عز وجل في سورة القلم.
يقول "خالد": "أنا واقف دلوقتي في أرض الجنة، كانت أرض الجنة، أنا واقف في المكان اللي ربنا حكى عنه في سورة القلم، ده المكان، أنت متخيل مساحة عاملة إزاي، تخيل المكان ده كله كان عبارة عن زرع وشجر وأزهار وثمار، يقال إنها كانت من أخصب الأراضي اللي خلقها ربنا، يقال إنها كانت من أكثر وأجود وأحسن الأراضي اللي موجودة في اليمن كلها، أنا عايزك تتخيل كده، شايف المنظر؟ المنظر مؤلم، على فكرة المنظر بيوجع، يعني تحس بانقباض، أكيد أكيد انتوا حاسين باللي أنا بقوله، بس بمجرد المنظر، فتخيلوا لو أنتو مكاني، تخيل الصخرة وأنا بشدها كأنك بتشد إزاز، حتى الصخرة اللي أنا راكز عليها بإيدي، تخيل عاملة إيه في إيدي، كأنك واقف على حاجة مدببة، سبحان الله، شايف دي بقت الأرض، تخيل دي كانت تربة طينية، تخيل لو قلت لك إن الأرض اللي أنا عليها دي كانت من أخصب الترب في العالم".

ويضيف الداعية الإسلامي "اللي ما يشكر نعمة ربنا دي النتيجة، اللي يخون أبوه بعد ما مات دي النتيجة {إِنَّا بَلَوْنَاهُمْ كَمَا بَلَوْنَا أَصْحَابَ الْجَنَّةِ} سماها جنة عشان تتخيل الوضع اللي إحنا فيه، المفسرين بيقولك كانت المرأة تشيل الوعاء أو تشيل شيء فوق دماغها وتمشي بيه ما تشد الثمر، تحط وعاء كبير فوق دماغها وتدخل بس أرض الجنة، تمشي فيها مجرد إنها تلمس الشجر فتتساقط الفاكهة تملى الطبق على ما تخرج، أو على ما توصل لنص أرض أهل الجنة ترجع مليانة، سماها ربنا جنة، السماء دي شهدت مطر كتير خير، أصل نية أبوهم كانت حلوة، أصل ربنا كان راضي، أصل الخير كتير، أصلهم كانوا بيتصدقوا، أصل أبوهم كان راجل خير، كان عايش للصدقة، كان عايش للغلابة والفقراء".

وتابع الدكتور "خالد": "كانت المرأة تشيل الوعاء تمشي بيه يتملي كل أنواع الفاكهة، ياه ما فيش شجرة واحدة إلا بره الأرض، لكن شايفين هنا ما فيش حاجة حد ياخدها، تخيل المشهد اللي أنت شايفه، وتخيل مشهد المرأة وهي شايلة الخير فوق دماغها".

وأردف الداعية الإسلامي "أقول لك حاجة المشهد ده ممكن يحصل في حياتك، عندكم فلوس، دلوقتي عايشين كويس، خلي بالك بقه وبص على الأرض كويس، العجيب يا جماعة إن أنت لو لقيت فجوة بين الصخور، دورنا على حتت فيها فجوات بين الصخور، لو دخلت إيديك هي صخور فوق بعضها، لو دخلت إيدك في حتة فيها فجوات زي ما أنا بعمل كده يطلع لك حاجة عجيبة قوي، يطلع لك رماد، إيه ده؟ شايف رماد، رماد، رماد، حاجة تخليك تعرف معقولة الطين اللي يطلع منه الزرع والثمر معصية ربنا تحوله لكده في ليلة واحدة؟ لا إله إلا أنت سبحانك إني كنت من الظالمين، أستغفرك وأتوب إليك، ما فيش حاجة تتقال إلا كده، ما فيش حاجة تتقال بعد اللي أنا فيه ده واللي أنا شايفه ده إلا كده، لا إله إلا أنت سبحانك إني كنت من الظالمين، يعني نسأل الله إنه يسترنا ويحفظنا بعد اللي احنا شايفينه ده".