قصة أصحاب الأخدود والساحر والراهب والغلام.. يسردها عمرو خالد

بقلم | مصطفى محمد | الخميس 24 يونيو 2021 - 01:00 ص

يسرد الداعية الإسلامي الدكتور عمرو خالد، خلال مقطع الفيديو المنشور على صفحته الرسمية على موقع "يوتيوب"، قصة من قصص القرآن الكريم ألا وهي قصة أصحاب الأخدود والساحر والراهب والغلام.
يقول "خالد"، قصة اليوم فيها دروس في العضم، في العصب، في عصب الأمة، كان في ملك اسمه ذونواس يعيش في اليمن سنة 523ميلادية، قبل النبي بأربعين سنة، ظلم ظلم شديد، أكل حقوق الناس، وعلشان يقدر يغطي علي أنه بيأخذ حقوق الناس وبيظلمهم -الظلم يبقي في مظلة يستخبى فيها، علشان الناس تسكت وتقبل إن هو بيأكل حقوقهم، فنصب نفسه، عمل لنفسه منصب جديد؛ منصب الإله ، نصب نفسه إله، علشان يأكل ويقتل ويسجن ويبهدل، فبقي الملك عامل مشكلتين؛ واكل حقوق الناس، ونصب نفسه مكان ربنا. والناس علشان خايفة من ظلم الملك، قبلت الملك يبقي إله، وسكتت، وقبلت الظلم، واتاكلت حقوقها، وسكتت، خايفة، وخلاص، ونسيوا ربنا، ونسيوا لا إله إلا الله بعد ما المسيح عليه السلام جه بلا إله إلا الله.
وأضاف الداعية الإسلامي أن "سنة 523 في اليمن قال الملك: أنا إله، ونسيوا ربنا، ونسيوا الكلام ده كله، وكل البلد بقت كده، ما عدا واحد؛ اللي بقي راهب. أبطال القصة بيظهروا واحد ورا الثاني، راهب كبير في السن؛ هو الوحيد اللي فاهم إن الملك كذاب ومخادع، وأن الملك منصب نفسه إله علشان يأكل حقوق الناس. الراهب في وسط ده كله عارف إن في مشكلتين لازم يعالجهم؛ المشكلة الأولي: أن لا إله إلا الله اتنست؛ ربنا، العقيدة، الإيمان، الدين، والمشكلة الثانية: إن الناس مش عارفة تعيش، حقوقها اتاخدت، فعايز يعالج مشكلتين في بعض، الاثنين الملك ركبهم في بعض، إزاي يفكهم؟ وعايز يعمل كده من غير عنف، هيعمل إيه؟"
بدأ الراهب يتكلم، بدأ يحاول يتكلم مع الناس، بدأت الناس يحصل همهمة في البلد، الحق، العدل، الحرية، الدين، ربنا، لا إله إلا الله، فالملك بطش، فخد واحد من هؤلاء اللي بيهمهموا بهذا الكلام، لسه الناس ما أمنتش ولا حاجة، دي همهمة، فمسك واحد من دول من اللي مصدق كلام الراهب، وقعد يئذيه، يئذيه، يئذيه. الراجل يقوله: بس انت مش إله، يئذيه، يئذيه، يئذيه، يقوله: ما انت ما بتعملش معجزات، الإله بيعمل معجزات، أنت ما بتعملش معجزات، يئذيه، يئذيه، يئذيه.

اقرأ أيضا:

وتابع "خالد" قائلا: "الراهب هرب، الملك حاسس من جواه إن هو فعلاً مش إله، وإن هو ضعيف، فعايز يعمل حاجة توري الناس إن هو قوي، عايز يعمل حاجة إعلامية توري الناس إن هو قوي، قام جايب ساحر دوره إيه الساحر؟ يقنع الناس إن ده إله، فبدأ الساحر بالخدع، يعمل حاجات، مش هو قاله ما بتعملش معجزات، يعمل حاجات، حاجات، حاجات، يوهم الناس إن السحاب بيتجمع وبيعمل اسم الملك بالخدع، وطبعًا كلام كله فاضي، والناس صدقت، واتقتل الراجل اللي كان بيهمهم، وهرب الراهب من اليوم ده، مين كان قاعد بيتفرج علي اللي بيحصل ده؟ ولد عنده سبع سنين صغير لسه أو عنده 8 سنين، اسمه إيه؟ مش عايز أقول اسمه، أنا عايز أسميه زي ما النبي سماه الغلام؛ علشان كل شاب صغير دلوقتي بيسمعني يعمل ودانه كده".
واستدرك الدكتور خالد قائلا: "الملك انبسط من الساحر، وبدأ الساحر يكبر في مملكة الملك، وبقه عنده قصر، وبقه دراع الملك اليمين، وبدأ ناجح، والناس كلها نسيت لا إله إلا الله، والظلم زاد، وحقوقها راحت، والراهب هرب، بس الراهب مطلوب، اللي يمسك الراهب له جائزة ألف ألف دينار، مليون للي يقبض عليه. الراهب هرب في كوخ أو في مغارة علي حدود المدينة، لكن لسه بيحاول يلاقي حد ولو واحد بس، أصل الراهب كبر وهيموت، واحد بس يقوله الرسالة، وفضل وضع المدينة كده سبع سنين، الغلام دلوقتي عنده كام سنة؟ عنده 15 سنة، وده وضع المدينة".
ويشير الداعية الإسلامي إلى "إوعوا تفتكروا إن الملك مبسوط من الساحر، ده هو الوحيد اللي عارف سره، ده الساحر هو اللي عمله، الملك عايز فرصة يخلص فيها من الساحر، وده اللي بيحصل في كل عصر وفي كل زمان، الساحر أدي دوره، فمين مستعد يبيع دينه ويبيع خداع الناس؛ علشان يقوي الملك، ويوري إنه أحسن من الساحر اللي فات، علشان يروح الساحر الماضي ويجي ساحر جديد؟ والساحر في كل زمان بيتغير، مرة يكون فن، ومرة يكون مانشيتات، ومرة يكون تليفزيون، ومرة يكون أغاني".

اقرأ أيضا:

وتابع: "تعالوا نسمع النبي بيقول إيه : "كان فيمن كان قبلكم ملك وكان عنده ساحر -أنا بحكيلك دلوقتي نص كلمات النبي صلى الله عليه وسلم -كان فيمن كان قبلكم ملك- شايف سمية وهي بتسمع رضي الله عنها، شايف أبو بكر وهو قاعد، شايف بلال الضعيف وهو بيسمع دلوقتي، شايف علي، شايف الزبير، علي والزبير وطلحة قاعدين بيسمعوا النبي كل واحد فيهم 15 سنة، - كان فيمن كان قبلكم ملك كان معه ساحر- تحس إن ملك الملك وسحر الساحر متلازمين؛ لأن الساحر هو اللي بيقنع الناس، علشان يفضل مِلك الملك وسيلة إعلان الملك، فقال الساحر: أيها الملك: إني قد كبرت- أنا عجزت خلي بالك الراهب عجز والساحر عجز- إني قد كبرت فانظر إلي غلام أعلمه السحر؛ ليبقي ما تصنع وما تريد- فاهمين الكلام، علشان يفضل اللي انت عايزه هاتلي ولد صغير، أنا محتاج إيه؟ أنا محتاج جيل جديد، الساحر بيقوله علشان يفضل الفساد ويفضل الظلم ويفضل خداع الناس محتاج جيل جديد أعلمه السحر".
وأردف الداعية الإسلامي بالقول "الملك وافق، فجاب له مين؟ جاب له البطل بتاعنا، هيظهر بقه في الصورة، مش بقول لكم أنا: مين يكتب ده فيلم؟ فظهر الغلام عبد الله بن سامر، هو ده اللي هياخده ويعلمه، الولد ذكي 15 سنة، فبدأ يتعلم السحر، فبدأ يتعلم الخدع، ومشي خلاص بقه في سكة الملك، هو أصلا مش صاحب رسالة ولا حاجة، مش فارقة كثير، ما البلد كلها كده، ومشي في سكة الملك، ودخل قصر الملك وشاف الأبهة، ياه! بقه أن هبقه مكان الساحر بعد كده وأعيش في العز ده، لسه صغير، حاجة تبهر طبعًا، دي تزغلل العينين، بس يا تري الحق أقوي؟ هنشوف، وهبقي مكان الساحر، ووو، وبدأ يتعلم الخدع، وبدأ يعرف يعملها، وبدأ يجيب السحر، الولد شاطر، يقول النبي:".. فكان الغلام إذا أراد أن يذهب إلي الساحر مر علي كهف الراهب- الراهب علي أطراف المدينة، والغلام غلبان، عيلته غلبانة، ساكن برة، فكل ما يجي يروح لقصر الملك علشان يتعلم السحر يعدي علي مين؟ ربك بيدبر، الملك يدبر، والساحر يدبر، وربك بيدبر فيعدي علي الكهف بتاع الراهب".